᱒᱐᱐᱓ ᱥᱮᱨᱢᱟ ᱨᱮ ᱰᱤᱥᱮᱢᱵᱚᱨ ᱪᱟᱸᱫᱚ ᱨᱮ ᱥᱟᱱᱛᱟᱲᱤ ᱯᱟᱹᱨᱥᱤ ᱥᱤᱧᱚᱛ ᱫᱤᱥᱚᱢ ᱨᱮᱱᱟᱜ ᱤᱨᱟᱹᱞᱟᱱ ᱛᱷᱚᱠ ᱨᱮ ᱥᱮᱞᱮᱫ ᱞᱮᱱᱟ ᱾ ᱩᱱ ᱚᱠᱛᱚ ᱥᱤᱧᱚᱛ ᱨᱮᱱ ᱥᱟᱱᱟᱢ ᱥᱟᱱᱛᱟᱲᱤ ᱥᱟᱶᱛᱮ ᱡᱮᱜᱮᱛ ᱡᱟᱠᱟᱛ ᱨᱮᱱ ᱥᱟᱱᱟᱢ ᱥᱟᱱᱛᱟᱲ ᱨᱮ ᱟᱹᱰᱤ ᱠᱚ ᱨᱟᱹᱥᱠᱟᱹ ᱞᱮᱱᱟ ᱾ ᱟᱨ ᱪᱮᱫ ᱵᱟᱝ ᱠᱚ ᱨᱟᱹᱥᱠᱟᱹᱜᱼᱟ ? ᱩᱱ ᱢᱟᱨᱟᱝ ᱥᱤᱧᱚᱛ ᱫᱤᱥᱚᱢ ᱨᱮᱱᱟᱜ ᱩᱱᱟᱹᱜ ᱜᱟᱱ ᱯᱟᱹᱨᱥᱤ ᱛᱟᱞᱟ ᱨᱮ ᱱᱚᱣᱟ ᱯᱟᱹᱨᱥᱤ ᱦᱚᱸ ᱢᱤᱫ ᱞᱮᱱᱟ ᱢᱟᱹᱱ ᱮ ᱧᱟᱢ ᱠᱮᱫᱟ ᱾ ᱱᱚᱣᱟ ᱜᱮ ᱵᱟᱝᱢᱟ ᱯᱩᱭᱞᱩ ᱟᱹᱫᱤᱵᱟᱹᱥᱤ ᱯᱟᱹᱨᱥᱤ ᱡᱟᱦᱟᱸ ᱫᱚ ᱥᱤᱧᱚᱛ ᱫᱤᱥᱚᱢ ᱨᱮᱱᱟᱜ ᱥᱚᱨᱠᱟᱨᱤ ᱢᱟᱹᱱ ᱮ ᱧᱟᱢ ᱠᱮᱫᱟ ᱾ ᱟᱵᱚᱣᱟᱜ ᱡᱟᱱᱟᱢ ᱯᱟᱹᱨᱥᱤ ᱡᱤᱭᱟᱹᱲ ᱫᱚᱦᱚᱭ ᱟᱨ ᱚᱱᱟ ᱩᱛᱷᱱᱟᱹᱣ ᱞᱟᱹᱜᱤᱫ ᱫᱤᱥᱚᱢ ᱨᱮᱱ ᱥᱟᱱᱟᱢ ᱥᱟᱱᱛᱟᱲ ᱠᱚᱣᱟᱜ ᱱᱚᱣᱟ ᱞᱟᱹᱰᱷᱟᱹᱭ ᱫᱚ ᱯᱟᱥᱮᱫ ᱑᱘᱕᱕ ᱨᱮᱱᱟᱜ ᱦᱩᱞ ᱛᱟᱭᱚᱢ ᱥᱟᱱᱟᱢ ᱠᱷᱚᱱ ᱢᱟᱨᱟᱝ ᱞᱟᱹᱰᱷᱟᱹᱭ ᱠᱟᱱ ᱛᱟᱵᱚᱱᱟ ᱾ ᱒᱐᱐᱓ ᱥᱟᱞ ᱟᱨ ᱚᱱᱟ ᱞᱟᱦᱟᱸ ᱨᱮᱱᱟᱜ ᱱᱚᱣᱟ ᱞᱟᱹᱲᱦᱟᱹᱭᱟᱹ ᱛᱟᱭᱚᱢ ᱛᱤᱦᱤᱧ ᱦᱟᱹᱵᱤᱫ ᱛᱮ ᱧᱮᱞ ᱞᱮᱠᱷᱟᱱ ᱧᱮᱞᱚᱜᱼᱟ ᱟᱵᱚ ᱱᱚᱣᱟ ᱡᱟᱱᱟᱢ ᱟᱲᱟᱝ ᱟᱹᱰᱤ ᱜᱟᱱ ᱜᱮ ᱩᱛᱷᱱᱟᱹᱣ ᱟᱠᱟᱱᱟ ᱾ ᱫᱤᱥᱚᱢ ᱨᱮᱱᱟᱜ ᱟᱹᱰᱤ ᱜᱟᱱ ᱵᱤᱨᱫᱟᱹᱜᱟᱲ, ᱡᱮᱜᱮᱛ ᱵᱤᱨᱫᱟᱹᱜᱟᱲ ᱠᱚᱨᱮ ᱯᱚᱲᱦᱚᱱ ᱠᱚ ᱪᱟᱞᱟᱜ ᱠᱟᱱᱟ ᱾ ᱱᱮᱻᱦᱟᱹᱞᱤ ᱜᱮ ᱱᱷᱟᱜ ᱥᱟᱱᱛᱟᱲᱤ ᱛᱮ ᱯᱩᱭᱞᱩ ᱥᱮᱴᱮᱞᱟᱭᱤᱴ ᱴᱤᱵᱷᱤ ᱦᱚᱸ ᱮᱛᱚᱦᱚᱵ ᱨᱮᱱᱟᱜ ᱠᱟᱛᱷᱟ ᱪᱟᱞᱟᱜ ᱠᱟᱱᱟ ᱟᱨ ᱡᱮᱜᱮᱛ ᱨᱮᱱᱟᱜ ᱛᱟᱞᱟ ᱨᱮ ᱢᱮᱱᱟᱜ "ᱨᱟᱲᱟ ᱜᱮᱭᱟᱱ ᱯᱩᱛᱷᱤ" ᱣᱤᱠᱤᱯᱤᱰᱤᱭᱟ ᱨᱮᱦᱚᱸ ᱥᱟᱱᱛᱟᱲᱤ ᱴᱷᱟᱹᱶ ᱮ ᱧᱮᱞ ᱟᱠᱟᱫᱟ ᱾
ᱛᱚᱵᱮ ᱟᱵᱚᱣᱟᱜ ᱵᱷᱟᱵᱽᱱᱟ ᱨᱮᱱᱟᱜ ᱠᱟᱛᱷᱟ ᱫᱚ ᱱᱚᱣᱟ ᱜᱮ, ᱥᱮᱫᱟᱭ ᱯᱤᱲᱦᱤ ᱠᱷᱚᱱ ᱵᱟᱲᱟᱭ ᱦᱮᱡᱽ ᱟᱠᱟᱱ ᱥᱟᱱᱛᱟᱲᱤ ᱠᱚᱣᱟᱜ ᱡᱟᱱᱟᱢ ᱫᱤᱥᱚᱢ ᱱᱮᱛᱟᱨᱟᱜ ᱡᱷᱟᱨᱠᱷᱚᱸᱰ ᱯᱚᱱᱚᱛ ᱨᱮ ᱥᱟᱱᱛᱟᱲᱤ ᱯᱟᱹᱨᱥᱤ ᱨᱟᱡᱽᱯᱟᱹᱨᱥᱤ ᱨᱮᱱᱟᱜ ᱢᱟᱹᱱ ᱮ ᱧᱟᱢ ᱢᱟ ᱾ ᱡᱟᱦᱟᱸ ᱫᱚ ᱱᱤᱛ ᱦᱚᱸ ᱩᱭᱦᱟᱹᱨ ᱨᱮᱜᱮ ᱢᱮᱱᱟᱜᱼᱟ ᱾ ᱤᱧᱟᱜ ᱟᱹᱥ ᱢᱮᱱᱟᱜᱼᱟ ᱟᱵᱚ ᱨᱮᱱ ᱥᱟᱶᱛᱟ ᱥᱩᱥᱟᱹᱨᱤᱭᱟᱹ, ᱨᱟᱡᱽᱟᱹᱨᱤᱭᱟᱹ ᱠᱚ ᱱᱚᱣᱟ ᱵᱟᱵᱚᱛ ᱠᱟᱹᱢᱤ ᱠᱚ ᱞᱟᱦᱟ ᱤᱫᱤᱭᱟ ᱾
ᱟᱨ ᱱᱟᱦᱟᱜ ᱫᱤᱱ ᱨᱮ ᱡᱩᱣᱟᱹᱱ ᱠᱩᱲᱤ ᱠᱚᱲᱟ ᱞᱟᱹᱜᱤᱫ ᱦᱚᱸ ᱢᱮᱱ ᱥᱟᱱᱟᱭᱤᱧᱟ ᱡᱮ ᱟᱯᱮ ᱜᱮ ᱟᱵᱚ ᱥᱟᱶᱛᱟ ᱨᱮᱱ ᱢᱩᱬᱩᱛ ᱵᱷᱤᱫ ᱫᱚ ᱟᱯᱮ ᱠᱚᱣᱟᱜ ᱞᱟᱲᱟᱣᱟᱱ ᱠᱩᱨᱩᱢᱩᱴᱩ ᱛᱮᱜᱮ ᱟᱵᱚ ᱫᱚ ᱟᱵᱚᱣᱟᱜ ᱡᱟᱹᱛᱤ, ᱯᱟᱹᱨᱥᱤ ᱟᱨ ᱥᱟᱶᱛᱟ ᱵᱚᱱ ᱞᱟᱦᱟᱸ ᱤᱫᱤ ᱫᱟᱨᱮᱭᱟᱜᱼᱟ ᱾
ᱢᱟ ᱛᱚᱵᱮ ᱱᱚᱣᱟ ᱨᱮᱜᱮᱹᱧ ᱢᱩᱪᱟᱹᱫ ᱠᱮᱫᱟ ᱾
(ᱤᱧ ᱜᱮ ᱻᱥᱟᱹᱜᱩᱱ)
Comments
Post a Comment